Tastendi Händli, äs flüchtigs Engelslächle, oder äs härzhafts Gähne.. di etstä Bilder vomene Neugeborene ihz’fange, hät für mich än ganz än bsundere Zauber a sich. Es sind Erinnerigä ane Ziit voller Stuhne, ä Ziit vo Fürsorg und Zueneigig, ä Ziit voll vo Geborgeheit… und joh, äs chan au ä strengi Ziit si. Drum chumi für äs Neugeborene-Shooting au gärn zu eui hei. Meistens suechäd mer üs zäme s’hällste Plätzli i dä Wohnig / im Huus mit möglichst viel Tagesliecht us.

Wenn isch dä Richtige Ziitpunkt für äs Neugeborene-Shooting?
Di Chliine pfuused i dä erstä zwei bis drü Wuchä viel und lönd sich i däre Ziit guet vo mir positionierä und kuschelig ihbettä. Natürlich achte i sehr druf, dass sich eui chliine Schätz wohlfühled. Sie sölled sich frei dörfe bewegä. I halte nüüt vo künstletä Pose. Viel wichtiger sind di gfühlvolle Moment zwüsche eui & euinä chliine Schätz. Wenn ehr eui Bilder, nur is Strickdeckeli ihkuschlet wünsched, bringi gärn äs Wärmeöfeli mit, wo däfür sorgt, dass sie nöd frühred. Aber au äs paar zauberhafti Bodys, Hösli & Strampler hani immer däbi.

Dörfed dä grossi Brüeder / s’grosse Schwösterli au däbi si?
Uf jedä Fall… äs entstönd mit dä Gschwüstertä immer uh härzigi Bilder! Am Beschtä mached mer die gad am Ahfang. Äs isch aber nöd nötig/empfehlenswärt, dass di ältere Gschwüstertä während äm ganze Shooting im Ruhm sind. Sie wärded noch einiger Ziit unruhig und das übertreit sich schnäll uf’s Chliine. Überlegäd eu doch vorgängig, wie sie sich nocher chönd zrugg zieh und sich guet beschäftige.

Wie lang duret äs Neugeborene-Shooting?
I nimm mir für äs Neugeborene-Shooting gärn chli meh Ziit (ca. 90min). Äs chan nämli guet sie, dass s’Mami zwüschedüre mues Stille, oder ä volli Windle druf wartet, vom Papi g’wechslät z’wärde.

Wenn sölli Kontakt ufneh, wenn mir möchted äs Neugeborene-Shooting bi dir buechä?
Mälded eui doch gärn äs paar Wuchä vorem errechnetä Geburtstermin bi mir, damit mer euri Wünsch und Vorstelligä chönd bespräche… und villicht scho mol än ungefähre Termin-Rahme verihbare.